قازاق بالالار وينى- ورامال تاستاۋ

ورامال تاستاۋ (ءبىرىنشى تۇرى)
ء «ورامال تاستاۋ» ويىنىنا قاتىناسۋشىلار ارالاسا شەڭبەر قۇرىپ وتىرادى. ويىن باستاۋشىنىڭ قولىنداعى ورامال شيىرشىقتالعان، ۇرۋعا ىڭعايلى بولادى. ويناۋشىلار ءان نەمەسە اڭگىمە ايتىپ وتىرعاندا، باستاۋشى ولاردى سىرتتارىنان اينالىپ، بىرەۋدى بەلگىلەپ، ونىڭ ارتىنا ورامالىن تاستاپ كەتەدى. ەگەر قايتا اينالىپ كەلگەندە، الگى ادام ءوزىنىڭ سىرت جاعىنداعى ورامالدى بايقاماسا، باسقارۋشى ونى ورامالمەن ۇرعىلايدى. ال ەگەر وتىرعان ادام ءوزىنىڭ سىرتىنا ورامال تۇسكەنىن بايقاسا، باستاۋشىنى قۋۋعا ءتيىس. ويىنشىدان قاشىپ جۇرگەن باستاۋشى بوساپ قالعان ورنىنا كەلىپ وتىرادى.

ورامال تاستاۋ (ەكىنشى تۇرى)
ء ويناۋشىلار ەكى توپقا تەڭ بولىنەدى دە، اراسى ون ادىمداي ەكى سىزىقتىڭ بويىنا قاراما‑قارسى قاتار جاساپ تۇرادى. ويىن جۇرگىزۋشى قولىنداعى ورامالىن ءبىرىنشى توپتاعى ءوز جاعىنداعى شەتكى ويىنشىعا بەرەدى. ول ورامالدى قارسى قاتارداعىلاردىڭ بىرەۋىنە تاستايدى دا: «قا»، ‑ دەپ داۋىستايدى، ول ورامال تاستالعان ويىنشى ونى قاعىپ الىپ: «عاز»، ‑ دەيدى، بولماسا «لا» ‑ دەيدى. سوندا قاعاز، قالا، ت. ب. سوزدەر شىعادى. ايتىلاتىن ءسوز ەكى بۋىننان عانا تۇرۋى كەرەك. مىسالى، «سا» دەپ داۋىستاسا – سا‑لاق، ساقا، سابىن، سارىن سياقتى سوزدەر ايتىلۋى كەرەك. ورامالدى قاعىپ العان ويىنشى ءبىرىنشى بۋىنعا قوسىلىپ اتاۋ ءسوز شىعاتىنداي ەكىنشى بۋىندى تاۋىپ ايتا الماسا، ورتاعا شىعىپ ونەر كورسەتەدى. ودان كەيىن ورامالدى قارسىلاستار توبىنا ءوزى لاقتىرادى. وسىلايشا ويناۋشىلار ورامالدى بىر‑بىرىنە لاقتىرىپ، ويىندى جالعاستىرا بەرەدى. 

سۋرەتىن تارتقان: ماقان قاپاس ۇلى



پىكىر قالدىرۋ

ءبىرىنشى بولىپ پىكىر قالدىرىڭىز!

avatar
  Subscribe  
ەسكەرتۋ