«شار» ەتە تۇسكەن راديودان تۋعان وي

 (شالقىما)

قاپاس اسەيىن ۇلى

2018-جىلدىڭ بالالار مەرەكەسىن قۇتتىقتاپ جاتقان ساتتەردە نەمەرەلەرىمىزدى قۇشاقتاپ، جيەندەرىمىزدى ءسۇيىپ ولارعا الىستان باسقارىلاتىن ماشينا، بالالارعا ارنالعان ەكىران الىپ بەرىپ، باقشاعا اپارىپ ويىنشىق پويەز، ۇشاقتارعا وتىرعىزىپ، ولارمەن بىرگە ۇشىپ، بىرگە قونىپ جۇرمىز. تارلانداپ قالعان كەزىمىزدە قاي-قايداعى زەرەمىزگە ءتۇسىپ، الشىنداپ قالدىق ءبىر. ولار ويىنشىقتارعا وتىرعانىنا ءماز، ءبىز ولاردىڭ شالقىپ كۇلگەندەرىنە ءمازبىز. بۇگىنگى بالالار باقىتتى بالالار، ولار قۇيرىعىن باسا تەلەديدار كورىپ، قولفونمەن جاعالاساتىن؛ ۇشاققا وتىرىپ، پاراحوتقا مىنىپ، وسىزامان عىلىم-تەحنيكاسىنىڭ قۇلاعىندا وينايتىن بولدى. ىشكەنى الدىندا، ىشپەگەنى ارتىندا؛ جەيمىن دەگەنىن جەپ، الام دەگەنىن الاتىن بولدى.

وتكەن عاسىردىڭ 60-جىلدارىنىڭ ءىشى،  اۋداندىق ورتا مەكتەپتە جاتاقتا جاتىپ ورتالاۋ وقىپ جاتقان كەزىمىز، ول جىلى التىنشى كلاستا  وقىيتىنبىز. اۋىل الىستا اققول دەگەن جەردە. كانيكولدا بولماسا ۇيگە قايتۋ جوق. ءبىر كۇنى ءارى تۋىس، ءارى ساباقتاسىم التىنبەك ەكەۋىمىز مەكتەپتىڭ قولدان سوققان بيىكتىگى بەلۋاردان عانا كەلەتىن مۇجىق داۋالىنىڭ جول بولىپ كەتكەن كەتىگىنەن اسىپ ءتۇسىپ، وسى داۋال عانا ءبولىپ تۇرعان جوعارى مەكتەپ تاۋىسىپ اۋداندىق اعارتۋ بولىمىنە كەلگەن اۋىلداسىمىز ءجۇنىس اعانىڭ جاتاعىنا ۇيالا-ۇيالا سالەم بەرىپ كەلدىك. اياعىمىزدا شىلعاۋ وراپ كيگەن كوك شاقاي، ۇستىمىزدە جاماۋ سالعان سىم-شاپانىمىز بار. كەلەتىنىمىز ول اعامىز شاي قايناتىپ بەرەمە، قايتاردا قولىمىزعا ماۋشان- ساۋشان سالاما دەگەن وي بولاتىن. ءيا، ول ءبىر تاپشى كەزدەر ەدى عوي ەستەن كەتپەس.  ول كىسى جاتاعىندا(ءارى كەڭسە) جازۋ جازىپ وتىر ەكەن. ءبىز بارعاننان كەيىن قاعازدارىن جيىستىرىپ قويىپ، بىزگە ءسال وتىرا تۇرۋدى ايتىپ سىرتقا شىعىپ كەتتى. اعامىز نەشە رەت كەزىگىپ قالىپ جاتاققا كەلىپ تۇرىڭدار دەپ ەدى باسىمىزدان سيپاپ. سونان ول كىسىنىڭ جاتاعىنا تۇڭعىش كەلۋىمىز. بۇل قالادان تانيتىنىمىزدا سول كىسى ەدى. قالاي وتىرارىمىزدى بىلمەي قوپاقشي بەردىك. ۇستەل ۇستى تولعان كىتاپ، قالام-قاعاز، قويشى، ايتەۋىر، ءبىز كورمەگەن نەمەسە كورسەك دەپ جۇرگەن تاڭسىق دۇنيەلەر. از وتىرعان سوڭ ەتىمىز ۇيرەنىپ انانى ۇستاپ، مىنانى كورە باستادىق. ءبىر تورتبۇرىش نارسە مەنىڭ نازارىمدى بىردەن اۋداردى، سونان ءبىر تۇتقاسىن ۇستاپ بۇراپ قالىپ ەدىم «شار» ەتە ءتۇستى. التىنبەك ەكەۋىمىز ەسىكتەن ءبىر-اق اتىلدىق شاعىپ-قيراتىپ كەتكەن ەكەمىز دەپ. التىنبەك ماعان ۇرسىپ كەلەدى. سول كەتكەننەن ۇزاق كەتىپ ول كىسىدەن ۇيالىپ قاشقالاقتاپ جۇردىك. تاعى ءبىر كۇنى اعامىز قوياردا-قويماي ءجۇرىپ جاتاعىنا ەرتىپ الىپ باردى. «انەكۇنى نەگە كەتىپ قالدىڭدار، بۇگىن جانە كەتىپ قالماڭدار، مەن شاي قايناتاتىن سۋ اكەلەيىن» دەپ، اناۋ ۋاقىتتا مەن بۇراپ قالىپ «شار»ەتە تۇسكەن تورتبۇرىش نارسەنىڭ مەن بۇراعان تۇتقاسىن بۇراپ جاتىر ەدى، الگى ساندىق سويلەپ كەتتى. التىنبەك ەكەۋىمىز بىرىمىزگە-بىرىمىز قاراپ اڭ-تاڭ قالدىق. سونان ۇقتىق ونىڭ توكپەن سويلەيتىن راديو ەكەنىن. سول كۇننەن باستاپ سويلەيتىن ساندىقتى كورگەنىمىزدى ايتىپ ماقتانىپ جۇردىك. ساباقتاستارىمىز بىزگەدە كورسەتسەڭدەر دەپ جالىناتىن بولدى.

ول داۋىردە قولساعات تاققان ادامدى كوردىك، كوڭكە كوردىك، تەمىرات كوردىك دەپ ماقتاناتىنبىز. اسپاندا ۇشاق ۇشىپ بارا جاتسا بۇكىل ەل بوپ اسپانعا قارايتىنبىز كۇن ساپ. اۋىل بالالارى جينالىپ الىپ تاسجولدان كوڭكەدەن بوساپ ءتۇسىپ قالعان بۇراندا ىزدەيتىنبىز، تاۋىپ العانىمىز التىن تاۋىپ العانداي ماقتاناتىنبىز. تاۋىپ العان بالا جالىنتىپ- جالبارىنتىپ ءجۇرىپ ارەڭ كورسەتەتىن الگى تاۋىپ العان بۇرانداسىن. بالشىقتان يلەپ ۇلكەندى-كىشىلى كوڭكە جاساپ، ءتورت دوڭگەلەك سالىپ ءجىپ تاعىپ سۇيرەيتىنبىز. جازدا جالاڭاياق سوقتىرپ كەتە بەرەتىنبىز. ايحاي، دۇنيە-اي، دەشى، سول كۇندەر ەسىڭە تۇسسە ساعىناسىڭ! شىبىقتى ات قىپ مىنىپ، شاڭداتىپ جۇرەتىن كىر-قوجالاق كەزدەرىمىزدى ويلاساڭ كوزىڭنەن جاس سورعالايدى. بۇگىنگى كۇنى سول قولساعات، كوڭكە، تەمىرات، راديو تاڭسىق بولماي قالدى؛ ءبىرىن الىپ، ءبىرىن تاستاپ، ىشكەنىڭ الدىڭدا، ىشپەگەنىڭ ارتىڭدا؛ التى ايلىق جەردى التى ساعاتتا باساتىن، جەر شارىنىڭ ول شەتىندە تۇرىپ بۇل شەتىمەن سويلەسەتىن بولدىق.

بالالار مەرەكەسى بايلانىسىمەن ۇرپاقتارىمىزدىڭ مىنا شات زاماندا شارىقتاپ جۇرگەنىنە شاتتانامىز. تارلانداپ قالعان كەزىمىزدە قاي-قايداعى زەرەمىزگە ءتۇسىپ، الشىنداپ قالدىق ءبىر. ولار ويىنشىقتارعا وتىرعانىنا ءماز، ءبىز ولاردىڭ شالىقتاپ كۇلگەندەرىنە ءمازبىز.

ءيا، ماڭگى كۇلىپ وتىڭدەر دەپ تىلەيمىز ۇرپاقتارىمىزعا!



  1. كوڭكە  اۆتوموبيل، تەمىرات  ۆەلەسيپەت.
  2. ماۋشان-ساۋشان  ءبىر-ەكى ماۋ اقشا دەگەن ءسوز.

 

 

 

 



پىكىر قالدىرۋ

ءبىرىنشى بولىپ پىكىر قالدىرىڭىز!

avatar
  Subscribe  
ەسكەرتۋ