ءجاميلا مالىك قىزىنىڭ ولەڭدەرىنەن

    ءجاميلا مالىك قىزى 1958-جىلى تامىزدا، اقساي اۋدانىنىڭ قايىز ساحاراسىندا دۇنيەگە كەلگەن. ول 1968-جىلدان 1972-جلعا دەيىن، دەمۋكرات اۋىلدىق باستاۋىش مەكتەپتەن ءبىلىم الادى. 1972-جىلدان 1975-جىلعا دەيىن، اۋداندىق تولىق ورتا مەكتەپتەن ءبىلىم الادى. 1975-جىلدان 1978-جىلى تامىز ايىنا دەيىن، تومەنگە تۇسىرىلگەن زيالىلار قاتارىندا كوللەكتيۆ ەڭبەككە قاتىناسادى. 1978-جىلى تامىز ايىنان 1985-جىل اياعىنا دەيىن، اۋىل-قىستاق جاتاقتى مەكتەپتەرىندە مۇعالىم بولادى. 1985-جىل اياعىنان 1992-جىلى قىركۇيەككە دەيىن، اۋداندىق باستاۋىش مەكتەپتە مۇعالىمدىق قىزمەتتە بولادى. 1992-جىلى قىركۇيەكتەن 2015-جىلى قازان ايىنا دەيىن، اۋداندىق وقۋ-اعارتۋ مەكەمەسىندە كاسىبي-تەحىنيكالىق زەرتتەۋ بولىمىندە ىستەيدى. باستاۋىش مەكتەپ جوعارى دارەجەلى وقىتۋشى كاسىپتىك اتاعىن العان.
جاستايىنان زەرەك، تىرىسشاڭ ول، اباي ولەڭدەرى، مۇقاعالي جىرلارى سياقتى ۇلى جازۋشىلاردىڭ اڭسەلى شىعارمالارىن وقىپ، جاتتاپ جۇرىپ ەرجەتەدى. سونداي-اق قالامگەر، اقىن اپەكەمىز ‹‹شۇعىلا››، ‹‹التاي اياسى››، ‹‹ىلە ايەلدەرى››، ‹‹قۇمىل القابى›› سياقتى اڭىستى جورنالداردان ءتاتتى جىرىن حالىقپەن ورتاقتاستىرىپ كەلدى.
ءبىز وسى جەردە، اقىن اپەكەمىزدىڭ قالامىنا قارىم تىلەي وتىرىپ، قولعا تۇسكەن ەكى ولەڭىن جالپى حالىققا ورتاقتاستىرىپ وتىرمىز. بۇدان كەيىنگى كۇندەردە، اللا قالاسا، باسقا ولەڭدەرىن دە، ورتاقتاستىراتىن بولامىز.

ارمانتاۋ اتىنان ونەر ساپارىڭىزعا ءسات تىلەيمىن!

ەگىز كول

كورىك بەرگەن سىمباتىمەن ەلىمىزگە،
سينامىن مەرەيلى ەگىز كولگە.
ايدىنىڭا ارايلى ءان ارنادىم،
سىنىعىنداي اسپاننىڭ تۇسكەن جەرگە.

قايىز كولىم جارقىراپ شار ايناداي،
كورگەن جان ەرىكسىزدەن تاڭدانعانداي.
تولقىنىڭا توعىسىپ ويلارىمدى،
ءوتىپ بارام تۇسىڭنان قاراي-قاراي.

كۋاگەر بوپ ەلىمنىڭ ەلدىگىنە،
تۇنىڭ پەيىل بايقاتتىڭ مولدىرىڭدە.
بالاي بەرەم شالقىعان شالقارىڭدى،
اقسايىمنىڭ پەيىلىنىڭ كەڭدىگىنە.

الۋان گۇلمەن كومكەرسەڭ اينالاڭدى،
اسىرامىن ءان جىرمەن ايبىنىڭدى.
قاجەتىنە حالىقىمنىڭ سيلاي بەرگىن،
جاراتىلىس سيلاعان بايلىعىڭدى.

اقبوز ۇيلەر تىزىلگەن جيەگىڭدە،
حالىقىم ءۇشىن كەرەمەت كيەلى دە.
مىڭعىرعاندا ءتورت تۇلىك جەرگە سيماي،
جايقالادى ءتۇرلى ءشوپ يەنىڭدە.

ەگىز كولدىڭ كورسەڭىز دالاسىن باي،
جەر ۇيىقتىڭ بالايسىز اناسىنداي.
ەگىز كولىم قانداي عاجاپ قاسيەتىڭ،
كورگەن جانعا ەرەكشە سالاسىڭ وي.

زەڭگىرىندە قىرانى اينالسا الىپ،
كۇمىس كولدە اققۋ ءجۇر سايران سالىپ.
جاسىل قۇراق جايقالسا جاعاسىندا،
جايراڭدايدى قارت شوپان قيقۋ سالىپ.

ەگىز كولدىڭ قاراشى دالاسىن باي،
ايالايمىن جاناردىڭ قاراسىنداي.
ايگىلى بوپ الەمگە تانىلا بەر،
اتى شىققان التايدىڭ قاناسىنداي.



پىكىر قالدىرۋ

ءبىرىنشى بولىپ پىكىر قالدىرىڭىز!

avatar
  Subscribe  
ەسكەرتۋ