مۇلىك سۋى (تاريحي دەرەكتى اڭگىمە)

اسەمحان مۇقامەتحان قىزى
(<<مۇرا>> جۋرنالىنىڭ2015-جىلعى 6-سانىنان جارىق كورگەن تۋىندى)

 جوڭگو قازاعىنىڭ “شىعىستاعى اق وتاۋى” اتانعان اقسايعا ات باسىن تىرەپ، باتىس جاعىنداعى تاۋى ادىر، جەرى قاعىر قانامباردىڭ ۇلانقايىر دالاسىن جەلمەن بىرگە كەزىپ، كۇن قاقتاپ قاڭىراعان يەن دالانىڭ ءاربىر جەر سۋ اتتارىنا نازار سالار بولساڭىز ول سىزگە بۇرىنعى وتكەن تاريحتان سىرلى دا سيقىرلى سىر شەرتەدى.
 اڭگىمەنىڭ تيەگى قانامباردىڭ قارا ادىرىنداعى “مۇلىك سۋ” اتانعان سىرلى جەر بولماق. بۇل جەر ءوز نامىسىن جات نيەتكە تاپتاتپاعان جاۋ جۇرەك قازاق باتىرلارىنىڭ باتىرلىق كۋاسى سپەتتى. وسى “مۇلىك سۋ” اڭىزىنىڭ تاريحي جەلىسى ارىراقتا بولىپ، مۇلىك اتتى ادامعا قاتىستىلىعىمەن وزدەرىڭىزگە اڭگىمە تيەگىن اعىتادى: تاريحي ماتەريالدارعا نەگىزدەلگەندە، مۇلىك اقشال ۇلى 1909-جىلى باركول اۋدانىندا تۋىلىپ، 1935-جىلى شىعىسقا اۋعان ەلمەن بىرگە گانسۋگە قونىس اۋدارىپ، گانسۋدەگى ءيۇمىن، ءيۇىرحۇڭ، اقسايدىڭ قانامبار جەرلەرىندە ءومىر سۇرگەن. ول 1951-جىلدىڭ قاراشا ايىندا اقسايداعى قانامباردىڭ باتىسى جۋا بۇلاق(تۇرعىن ەل “مۇلىك سۋ” دەيدى) دەگەن جەردە باندى شويانى ( ناق اتى بي شانلۋ، قازاقتار شويا دەپ اتاپ كەتكەن) ءولتىرىپ، مۇزدىق دەگەن جەردە شويانىڭ زورەكەر توبىن ەرلىكپەن جويعاننان كەيىن، رۋ ۋاكىلى رەتىندە گانسۋ دۇنحۋاڭداعى ۇكىمەت جيىنىنا قاتىناسىپ، ءوز اۋلەتىمەن بىرگە ۇكىمەت قۇشاعىنا قايتا ورالعان.
 مۇلىك اقسارى جۇقالتاڭ ءوڭدى، ىقشام قاڭىلتاق دەنەلى، ارەكەتى تەز، مىنەزى ءتۇزۋ، ەكى سويلەمەيتىن، ادىلدىكتى جاقتايتىن، ادامدارعا جۇعىسقىش كىسى ەدى.
ول ۇركىن-قورقىن زاماننىڭ سالدارىنان با، جوق، وزىنە بىتكەن ادەت پە، كۇندىز ۇيىقتاپ، تۇندە ۇيىقتامايتىن قۇس ۇيقىمەن وتكەن ادام ەكەن. مۇلىكتىڭ ءبىر ۇيدە قونعاندا تولىق ۇيىقتاعانىن ەشكىم دە كورگەن ەمەس. ال ءمالىم ءبىر قونىستا ۇزاعىراق تۇراقتاپ وتىرعانىن دا، ەشكىم ءداپ باسىپ ايتىپ بەرە المايدى. مۇلىك قۇرالايدى كوزدەن اتقان اسقان مەرگەن ءارى جاۋجۇرەك باتىر بولىپتى. قانامباردا “مۇلىك سۋى”، “مۇلىك اسۋى”، “مۇلىك سايى”، “مۇلىك شوقىسى”، “مۇلىك داراسى” دەگەن جەر اتتارى كۇنى بۇگىن اتىن جويعان جوق.
ازاتتىقتىڭ الدىندا مۇلىك باتىر التىن تاۋ وڭىرىندەگى كەن قازعان جانە ساۋدا ىستەگەندەرمەن قويۋ ارلاستىق ورناتۋشى ەدى. قانامبار وڭىرىنە قاشىپ كەلگەن ءبي شانلۋ ءوزىن وسىنداي ادامداردىڭ قاتارىندا مۇلىككە تانىستىرعان بولاتىن. ءبي شانلۋ جەر جاعديىنا قانىق بولماعاندىقتان مۇلىكتەن پايدالانۋ ءۇشىن ونى وزىنە تارتىپ، تامىر تانىس بولىپ، 1951-جىلى مۇلىك اۋلەتىمەن كورشى ءارى قونىستاس بولادى. ءبي شانلۋ ازاتتىقتىڭ الدىندا، زورەكەر پومەشيك جەر يەلەرىنىڭ سارقىنشاقتارى مەن گومينداڭ قاشقىن اسكەرلەرىنەن قۇرام تاپقان ەلۋ الپىس ادامدى توپتاپ، ءوزىن ولارعا باس اتامان ەتىپ سايلاپ، التىنتاۋ وڭىرىندە باسىمدىلىق ارەكەتتەرمەن شۇعىلدانىپ جۇرەدى.
 ءبي شانلۋ زورەكەرلىك ىستەپ، قازاق مالشىلارىنىڭ دۇنيە مۇلكىن تارتىپ الىپ، قازاق ايەلدەرىنە سۇعىن قادايدى. ونىمەن قويماي ءوزى تانىس بوپ جۇرگەن مۇلىكتىڭ سۇلۋ ايەلىن تارتىپ الۋداي ارام نيەتتە بولادى. مۇنى ىشتەي سەزگەن قاعىلەز مۇلىك، وسى ارام نيەتتى زورەكەر توپتىڭ كوزىن قۇرتۋدى ىشىنە تۇيەدى. سول جىلدىڭ كۇزىندە حالىق ازاتتىق ارمياسى تاۋداعى باندىلاردى تازالاۋعا كىرىسە باستاعانىن ەستىگەن بي شانلۋ ءوزىنىڭ اقىرزامان كۇنىىنىڭ تاياعانىن سەزىپ، سىرت مەملەكەتكە قاشۋعا ىشتەي دايارلىق جاسايدى. مۇلىكتىڭ جەرجاعدايىنا قانىق ەكەنىن بىلەتىن بي شانلۋ، باستارىنا الاي-بۇلاي كۇن تۋسا، جان ساۋعالاۋ ءۇشىن جول شالىپ كەلۋگە دايىندىق كورۋدەي “سۇڭعىلالىعىن” ايتا كەلىپ، مۇلىكتى جول باستاۋعا ۇسىنىس ەتەدى. بۇل وزىنە تارتىلعان شىرعا ەكەنىن سەزگەن مۇلىك ماقۇل بولادى دا، ىشتەي دايىندىعىن كورەدى. مۇلىك باتىردىڭ ەسىنە وسى ارام نيەت توپتىڭ وزىمەن تانىس بولعان العاشقى كەزدەرى ورالدى…
 قازاقي داستارقان ءجايىلىپ، شاي قۇيىلىپ جاتقان ارەدىكتە، مۇلىك بي شانلۋدىڭ جىپسىرايعان سۇقتى كوزىن باسىندا قىزىل جەلەگى جەلبىرەگەن، ءوزىنىڭ جاس تا سۇلۋ كىشى ايەلىنە قاراعىشتاي بەرگەنىنەن ءبىر سۇمدىقتىڭ نىشانىن بايقاپ قالعان ەدى.
 مۇلىك ءبي شانلۋدىڭ وزىمەن تانىس بولعاننان بەرى جۋاس قازاق مالشىلارىنا دەگەن كوپتەگەن تالان-تاراجىلىق ارەكەتتەرىن ءوز كوزىمەن كورىپ، قازاق ۇلتى قابىلداي بەرمەيتىن، جات تا بوگدە قىلىقتارىن ىشىنە سيعىزا الماي ءجۇردى. مۇلىك وعان بۇلاي ىستەمەۋدى تالاي رەت دە ەسكەرتكەن بولسا دا، ول كۇن كورىس پەن تىرشىلىك جولىن سىلتاۋ ەتىپ زورەكەر ارەكەتىن قويمادى. مۇلىك ودان ىرگەسىن اۋلاققا سالۋدى دا ويلاپ ءجۇردى. بىراق بۇعان ءبىر ءجونى كەلمەدى. مۇنان سوراقىسى، ءبىر كۇنى كەشكى بەسىن مەزگىلىندە، مال بايقاستاپ قايتقان مۇلىك، ءوز ءۇيىنىڭ جوعارى جاعىنداعى دوڭەستەۋ جەردەگى ءبي شانلۋدىڭ پوتايىنداعى پلومەتى مەن قاراۋىل اسكەرلەرىنىڭ مىلتىعى ءوز اۋىلىنا قاراپ ءتونىپ تۇرعانىن بايقاپ قالادى دا، ەشتەمە سەزبەگەندەي، بي شانلۋدىڭ شاتىرىنا بارىپ: -بىزگە جاۋ كەلدى مە، بۇل قانداي جاعداي؟ ماعان حابارلاماي، نە ءۇشىن ءوز الدارىڭا سوعىس جۇرگىزگەلى جاتىرسىڭدار؟-دەيدى. ارام نيەتى ءبىلىنىپ قالماۋدىڭ قامىن ويلاعان بي شانلۋ: – ءبىز، ءسىزدى توسىپ وتىرعان ەدىك، الدىن الا حابار بەرمەگەنىمىزگە كىنالىمىز، ءبىزدىڭ ادامدار اسكەري جاتتىعۋ جۇرگىزىپ جاتىر، ەشتەمە بولمادى، جاۋ دا كەلمەدى!- دەيدى ءسوزىن مايدالاپ. بۇل ىسجۇزىندە بي شانلۋدىڭ مۇلىكتىڭ كوزىن جويىپ، ايەلى مەن مال مۇلكىنە يە بولىپ، سىرت مەملەكەتكە قاشىپ كەتۋ ارام نيەتىنىڭ ءبىر بەلگىسى ەدى.
ۇيىنە ورالعان مۇلىك ايەلىنە بىلاي دەيدى: – مەن ەرتەڭ بي شانلۋعا جول باستاپ، جەر شالۋعا بارامىن، شامامەن بەس كۇندە ورالامىن، وسى جىرىق باستاۋدىڭ باتىسىنداعى (سول جەردەن ءبىر كۇندىك الىستىقتاعى) قارا شوقىعا قارۋىل قويىپ، مەنىڭ جولىمدى كۇت، ەگەر ءبي شانلۋدىڭ قاراسى كورىنسە مەنىڭ ولگەنىمنىڭ بەلگىسى، وندا، بالا-شاعا مەن ازاماتتاردى جيىپ تەز قامدانىپ، باتىس سولتۇستىك جاقتى نۇسقاپ،( جەر اتى بەلگىسىز) سول سىرلى دا جاسىرىن تاۋعا قاراي اتتان. ال، مەنىڭ قارام كورىنسە، وندا، ەش ابىرجىماي، موسىعا شايىڭدى اسىپ، اس سۋىڭدى دايىنداپ جايبىراقات وتىرا بەر!-دەيدى.
ءبي شانلۋ قاسىنا كومەكشىشىسىن ەرتىپ، قارۋ جاراق ازىق تۇلىگىن قامداپ، مۇلىكتى ەرتىپ قانامباردىڭ باتىسىن بەتكە الىپ جولعا شىعادى. مۇلىكتىڭ جانىنا ەشبىر جولداس ەرتپەي جالعىز شىققانىنا بي شانلۋ ىشتەي قۋانادى. ءارى جولداس ەرتپەگەن سەبەبىن سۇرايدى. مۇلىك بۇل ءبىر جاي عانا جول باستاۋ بولىپ، وزىنە ەشبىر حاۋىپ جوق ەكەنىن ايتادى. بۇلار باتىسقا قاراي ەكى كۇن جول جۇرەدى. جول بويى بي شانلۋ مۇلىكتەن جەر جاعدايى مەن سۋات جانە جول ءجونىن سۇراپ ۇعىسىپ وتىرادى. مۇلىك بارلىق جەر مەن جول جاعدايىن مۇقياتتىقپەن ءبي شانلۋعا تۇسىندىرەدى. ارەدىك تاماق ءىشۋ بارىسىندا مۇلىك ولارمەن بىرگە تاماقتانباي، ءوزىنىڭ شاي ءشوبىن( ول كەزدى شاي جوق بولعاندىقتان، شاي ءشوپتى شاي ورىنىندا ىستەتەدى) قايناتىپ ءىشىپ، قارا بورشاسىن( بۇل اڭ ەتى، ول كەزدە استىق جوق) جەۋمەن بولادى. ءبي شانلۋ بىرلىكتە تاماقتانۋعا شاقىرادى. مۇلىك ءوزىنىڭ اسقازانى جايسىزدانىپ تاماققا تابەتى تارتپايتىنىن ايتادى. تۇندە جاتقاندا زىميان بي شانلۋ مۇلىكتى قاشىپ كەتەدى نە بولماسا قاستىق ىستەيدى دەپ ورتالارىنا الىپ جاتۋمەن بولادى. كورپەنىڭ ەكى شەتىن ەكى كومەكشىسىنىڭ جامباسىنىڭ استىنا باسقىزىپ جاتقىزادى، ءوزى مۇلىكپەن قاتار ورتاسىنا جاتادى، تۇندە ۇيىقتاعاندا دا بەس اتارمىلتىعىن كەۋدەسىنە قويىپ قولىمەن ۇستاپ جاتىپ ۇيىقتايدى. ءبي شانلۋدىڭ ارام ويىن بۇرىننان بىلەتىن مۇلىك 3- كۇنى جۋا بۇلاققا ( كەيىن “مۇلىك سۋ” اتانعان) جەتكەندە، سول جەردىڭ سۋى جاقپاي ءىشى ءوتىپ توقتاماي قويعانىن بي شانلۋعا نەشە رەت ايتسا دا، بي شانلۋ سەنبەيدى. بىراق مۇلىك ءالسىن-الى دارەتكە شىعىپ، ولاردىڭ مازاسىن الىپ بولماعان سوڭ، مۇلىكتى شەتىنە جاتقىزادى. ءبىراق وتىرىك ۇيىقتاعان بي شانلۋ مۇلىكتىڭ قىبىر قيمىلىن اڭدۋمەن ءارى ونىڭ كوزىنىڭ ۇيقىعا كەتۋىن كۇتۋمەن بولادى. اۋەلى كومەكشىسىنە سىبىرلاپ ونىڭ دارەتكە بارعانىن دا اڭدىتادى. بۇدان ەش كۇدىكتى قيمىل بايقاي المايدى. سونىمەن جول جۇرگەندەگى شارشاۋ مەن ۇيقىنىڭ مەڭدەتۋى قوسىلعان بي شانلۋ مىزعاپ كوزى ءىلىنىپ كەتەدى. وسى ءساتتى توسىپ جاتقان مۇلىك، كورپەنىڭ شەتىنەن سۋسىپ شىعىپ، دارەتكە بارعان بولىپ قايتا كەلەدى، جوتكىرىنىپ، ءتىپتى دىبىستاپ بايقاپ كورەدى. ولاردان ەش قىبىر بىلىنبەي ۇيقىعا كەتكەن ەكەن. وسى شەشۋشى ءساتتى كۇتكەن مۇلىك ءوزىنىڭ جەڭىل دە شاپشاڭ قيمىلىمەن، الىپ جۇرگەن بەس اتارىمەن ءبي شانلۋدى باسىنان دالدەپ اتىپ قالادى. دۇنيەنى جالپاعىنان باسقان بي شانلۋ ىڭىرانىپ بارىپ قۇلاپ ءتۇسىپ جان ۇزەدى. سول كەزدە مىلتىق داۋسىنان شوشىپ ويانعان كومەكشىسى مۇلىككە قاراي ۇمتىلعاندا ول: – انانى قارا، جاۋ كەلدى!- دەي بەرىپ، ول ارتىنا بۇرىلعاندا، ونى دا تۋ سىرتىنان اتىپ قالىپ جانىن ءجاھانامعا جىبەرەدى. مىنە وسىلايشا كوز ىلەسپەس تەزدىكپەن ەكەۋىن جايراتىپ سالعاننان كەيىن، بي شانلۋدىڭ مۇسىلمان دىنىندە ەكەنىن ەسكەرىپ، ول ەكەۋىن مۇسىلمانشىلىق جولمەن بەتىن جاسىرىپ جەرلەيدى دە، تاڭ راۋانداعان شاقتا اۋىلىنا قايتىپ، ءتورتىنشى كۇنى قارا شوقىداعى قاراۋىلعا جاقىنداپ سەگنال بەرەدى.
مۇلىك ايتقانىنداي بەسىنشى كۇنى بەسىندە اۋىلىنا ورالادى. بي شانلۋدىڭ اسكەري اتامانى انتالاپ كەلىپ، ابىرجي جاعدايدى سۇراعاندا، مۇلىك ءوز ۇيىندە مالداس قۇرىپ، جايبىراقات ايەلى قۇيعان شايدى ءىشىپ وتىرىپتى. سوندا ابىرجىعان اتامانعا سامارقاۋ كوز تاستاعان مۇلىك باتىر: -اتامان، نەسىنە ابىرجيسىڭ، بي شانلۋ مەنى سەندەرگە الدىن الا ءشۇيىنشى سۇراپ، جۇمىس ورنالاستىرۋعا جىبەردى، ءبىز مول ولجاعا باتتىق، ءبىر جۇك كەرۋەنىنە كەز بوپ، بي شانلۋ سول جۇك كەرۋەنىن ايداپ ارت جاقتا قالدى. ماعان الدىن الا وسى جاعدايدى حابارلاۋعا جىبەردى. ءبىز ۇلكەن دايارلىق كورىپ، بي شانلۋ كەلگەن سوڭ، دەرەۋ وسى ارادان كەتەمىز، ايتپەسە كەرۋەن قۋعىنشىسى كەلسە، شيپامىزدىڭ بىتكەنى سول، سەن اسكەرلەرىڭە بۇيىرىق بەرىپ، ورىستەگى ات تۇيە مەن قويدى جيعىزىپ اكەلىپ، دۇنيە مۇلىك، قوس شاتىرلاردى جانە قارۋ جاراقتاردى جيناپ، كوشۋگە دايىندالىڭدار!-دەيدى دە، جالعاستى شايىن ءىشىپ وتىرا بەرەدى. اتامان، ەلۋدەي اسكەردى توپ-توپقا ءبولىپ جۇمىس ورنالاستىرۋعا كەتەدى. وسى ورايدى كۇتكەن مۇلىك باتىر ءوز جاعىنىڭ ادامدارىنا جاعدايدى استىرتىن حابارلاپ، پوتايداعى پلومەتتى يەلەۋدى ايتادى. بي شانلۋدىڭ شاتىرىنا بارىپ، باقىرشىلارىنا: -كوشكەندە تۇيەكيىكتىڭ ەتىن الىپ ءجۇرۋ قولايسىز، اسىرەسە سۇيەك جىلىكتەرىن اسىپ جەپ الايىق!-دەپ ولاردى قازان جاققا اينالدىرادى دا، قارۋ-جاراققا كوز جۇگىرتەدى. بارلىق مىلتىقتاردى جيىستىرعىزىپ، ىڭعايلاتىپ قويادى. ەندى انىقتاپ قاراسا، جالعىز اق گارمان قالىپتى. ول قابىرعا دا ىس شالىپ، تات باسقان كۇيىندە ءىلۋلى تۇر ەكەن. ءسۇرتىپ قويعان بوپ، ونىڭ شاقپاعىن بىلدىرتپەي الىپ تاستايدى دا، قايتا اپارىپ ورنىنا ءىلىپ قويادى. ايەلى مەن ءۇي ىشىندەگىلەرىنە جاسىرىن جىراعا بارىپ تىعىلىپ تۇرۋدى ايتىپ كەتكەن. تۇيە مەن جىلقى باققان باقتاشىلارعا ءتىل جىبەرىپ، نەگىزگى وڭتايلى جەردى يەلەۋدى ايتقان. قوي باعاتىن ءوز ادامدارىنا دا وسىلاي ىستەۋدى تاپسىرعان. سونىمەن قاتار ارەكەتى ەبدەيلى، مىقتى ءبىر جىگىتكە باسپالاپ بارىپ بىلدىرتپەي پوتايداعى پلومەت ۇستاۋشىنىى ءولتىرىپ، پلومەتتى يەلەۋدى تاپسىرعان. ول جانىن سالىپ ءجۇرىپ، قالعان بىرنەشە قارۋىلشىعا بايقاتپاي، پوتايدىڭ ارت جاعىنان ەپتىلىكپەن كىرىپ، ارى قاراپ تۇرعان قاراۋىلشىنى ۇرىپ جىعىپ، پلومەت ۇستاۋشىنى ءساتتى ءولتىرىپ، پوتاي مەن پلومەتتى يەلەدى. “بۇل جەردەن كەتەمىز” دەگەندى ەستىپ، بي شانلۋدىڭ قول استىنداعى تاۋەلدى ءارى جاپالى تۇرمىسقا ارەڭ ءتوزىپ جۇرگەن اسكەرلەر ءارتۇرلى دايىندىق جۇمىستارىنا بەلسەنە ات سالىسىپ كەتكەندىكتەن، پوتاي جانە قارۋىلدا كوپ ادام قالماعان. وسى ماڭىزدى ءساتتى مۇلىك باتىر تولىق مەڭگەرە بىلگەن ەدى.
 اسكەرلەر مەن جالشىلار قۇرالىسىپ، ۇلكەن قازاننان تاماق ءىشىپ، تۇيەكيىكتىڭ جىلىگىن شاعىپ جەمەكشى بولعاندا، مۇلىك باتىردىڭ تاپسىرۋىمەن، مۇلىكتىڭ مالشىسىنىڭ ىشىندە بيشانلۋ اسكەرلەرى جاعىنان كوبىرەك جابىر كورەتىن قويشى(اتى ەسىمدە جوق)، بۇرىنعى ولاردان كورگەن قورلىعىن ايتىپ، ادەيى قايشىلىق شىعارىپ توبەلەس باستايدى، ءتىپتى جىلىكپەن ءبىر-بىرىن ۇرۋعا دەيىن بارادى. وسىنداي قايشىلىق ۇدەپ، مۇلىكتىڭ ادامدارىنان ادەيى ءبولىنىپ شىعىپ، الدى مۇلىككە شاعىم ايتۋعا كەتەدى. ارتى شاتىر ىشىندە ءبىرىن-بىرى ۇرىپ اپالاس-توپەلەس، ايقاي شۋ بولادى. ءتىپتى قارۋ الىپ اتىسۋعا ىڭعايلانادى. ءىلۋلى تۇرعان اق گارمانعا قول سوزعان باس اتامان، مىلتىقتىڭ شاقپاقسىز ەكەنىن سول كەزدە عانا ءبىلىپ، ساسقالاقتاپ، جان-جاعىنان قۇرال ىزدەي باستايدى. بارلىق قۇرالدىڭ “كوشەمىز” دەگەن سىلتاۋمەن الدە قاشان مۇلىك ادامدارى جاعىنان الىنىپ بولعانىن ەندى عانا اڭعارادى. سونىمەن جانتالاسىپ پوتاي جاققا ۇمتىلعاندا، وزدەرىنىڭ الدە قاشان مۇلىك ادامدارى جاعىنان قورشاۋدا قالعانىن سەزەدى. سۇڭعىلا دا، زەرەك، قاعىلەز دە، ايلالى مۇلىك باتىر بي شانلۋ جانە ونىڭ قول استىنداعى اسكەرلەرىن وزىنەن ەش شىعىنسىز، ولاردىڭ وزدەرىنىڭ پلومەت جانە مىلتىقتارىمەن تىپ-تيپىل ەتىپ قىرىپ سالادى.
 ءبىر رەتكى تۇقىمى تۇزداي قۇرتىلارداي قاندى قىرعىننان اۋىلىن وسىلايشا امان الىپ قالعان ەدى. مۇلىك باتىردىڭ شويانى(شويا ءسوزى حانزۋ تىلىندە 少爷 حانزادا ماعىناسىن ءبىلدىرىپ، قازاقتار ءتىلى كەلمەي “شويا” اتاندىرعان) ولتىرگەن، ىسكەر دە ەپتى، ايلالى دا جاۋ جۇرەك بۇل اڭگىمەسى كۇنى بۇگىن اقساي ەلىنىڭ تامسانىپ ەسكە الاتىن اڭىزىنا اينالىپ، ۇرپاقتان ۇرپاققا جالعاسىپ كەلەدى. سوندىقتان جەرگىلىكتى تۇرعىن ەل مۇلىك باتىردىڭ شويانى ولتىرگەن جەرىن “مۇلىك سۋى” دەپ اتاۋى وسى اڭىزدان تاراعان. سول كەزدە كوركىمەن كوز سۇرىندىرگەن مۇلىك باتىردىڭ سۇلۋ ايەلى الما پىسقانباي قىزى(مۇلىك باتىرعا ۇزاتىلعاندا 15 جاستا عانا ەكەن)، مۇلىك باتىر ولگەننەن كەيىنگى ءومىردىڭ ىستىق-سۋىعى مەن زوبالاڭ مادەنيەت توڭكەرىسىنىڭ تەپكىسىنە كونە ءجۇرىپ، مۇلىك باتىردىڭ ورنىن ساقتاپ، ءتۇتىنىن ءتۇزۋ ۇشىرىپ، شيكى وكپە ۇرپاقتارىن باعىپ قاعىپ، تاربيەلەپ جەتىلدىرىپ، بۇگىنگى باقىتتى ءومىردىڭ قۇشاعىنا جەتكىزىپ، قوعامعا ءوزىنىڭ ءبىر كىسىلىك ۇلەسىن قوستى.
 بۇكىل ءومىرىن ۇرپاعىنىڭ باقىتىنا ارناعان قايسار دا ۇلى انا 2011-جىلى اقساي اۋدانىندا، 83 جاسىندا دۇنيەدەن ءوتتى. بۇل اڭگىمە، سول كەزدەگى ۋاقيعانىڭ باسى قاسىندا بولعان ادامداردىڭ اڭگىمەلەپ قالتىرۋى ارقىلى قازىنالى قارتتار اۋزىنان بىزگە جەتكەن ءتىرى تاريح ەدى. بۇگىنگى بوزتورعاي جۇمىرتقالاعان بەيبىت داۋىردە مۇلىك باتىردىڭ ۇرپاقتارى مەن نەمەرە شوبەرەلەرى اقساي ەلىندە باقىتتى دا باياشاتتى تۇرمىس كەشىرۋدە!


پىكىر قالدىرۋ

ءبىرىنشى بولىپ پىكىر قالدىرىڭىز!

avatar
  Subscribe  
ەسكەرتۋ