التىنتاۋ باۋرايىنداعى مەيىرلى جاندار

ماقالانى  جازعان: اسەمحان مۇقامەتحان قىزى

گانسۋ  ولكەسى اقساي اۋدانى التىنتاۋ باۋرايىندا، گۇلدەن وقان قىزى، مۇقىر قۇسان ۇلى، گۇلجاز ءسادۋ قىزى، امانگۇل ءداۋىتقان قىزى، نۇرزال قاداقاي قىزى قاتارلىلار باس بولىپ ۇيىمداسقان ءبىر  توپ مەيىرلى جاندار  قوسىنى جارىققا شىقتى. ولار العاشىندا وزدەرىنىڭ باسىنان وتكەن قيىنشىلىقتارىن ەسكە  الىپ، وسى قات-قابات قيىنشىلىقتا قالعانداعى كوڭىل كۇيلەرىن ەستەرىنەن ءبىر ءسات  شىعارعان ەمەس.

ولار  سول كەزدە، كومەككە قانشاما ءزارۋ بولعاندارىن تەك وزدەرى عانا بىلەدى. ادامدار  اراسىنداعى مەيىرىمدىلىكتىڭ قانشاما قىمبات، قانشاما اسىل نارسە ەكەنىن تەك سول  جاندار عانا بىلەتىن شىعار!

ۇيتكەنى  ولار، ءوز ەرىكتەرىمەن ۇيىمداسىپ، ءوز قالتالارىنان اقشا شىعارىپ، وسى “مەيىرلى  جاندار” توبىنا كىردى. بۇل توپتىڭ كوپ ساندى مۇشەلەرى قالتاسىنا اقشاسى سيماي  جۇرگەن “بايلار” ەمەس!  قايتا، ادەتتەگى جۇمىسشى قىزىمەتشىلەر، تومەن جانە ورتاشا  كىرىستەگىلەر، جەكە كاسىپكەرلەر،  مالشى ديحاندار، زەينەتكە شىققاندار، جۇمىسسسىزدار، ءتىپتى مۇگەدەك جاندار دا بار بۇل قوسىندا! كەيبىرەۋلەرىندە تۇراقتى  جۇمىسى مەن ەڭبەك اقىسى دا جوق. مىنە وسىنداي بولا تۇرسا دا ءوز قيىنشىلىقتارىن  قايىرىپ قويىپ، وسى اقساي كولەمىندە جاساپ جاتقان ەكونوميكالىق قيىنشىلىعى بارلار  مەن اۋىرۋ سىرقاۋ بولىپ وتىرعاندارعا حانزۋ  قازاق دەپ ۇلتقا ايىرماي جارقىلداعان  اق كوڭىلدەرىمەن، اسا قىمبات ادامگەرشىلىك مەيىرلەرىمەن اي سايىن 3 ادامعا اقشالاي  كومەك بەرۋدى وزدەرىنىڭ بۇلجىماس مىندەتتەرى ەتىپ بەلگىلەدى. بۇل قانداي تاماشا  ءمورال دەسەڭىزشى! ۇيتكەنى ولار سەمياسى مەن ۇكىمەتكە اۋىزدارىن اشىپ،  امالسىز  وتىرعان قورعانسىز جاندارعا از دا بولسا ءوز كومەك قولدارىن سوزىپ، اۋىرتپاشىلىقتى  بىرگە كوتەرىسىپ،  ءوز ەرىكتەرىمەن  ۇيىمداسقان  قوعامعا ۇلگى بولارلىق  “ناعىز  مەيىرىمدى جاندار”  بولعىسى كەلدى.

بۇل  “مەيىرلى جاندار” قوسىنى 2016-جىلدىڭ باسىندا ەڭ العاش  قۇرىلعاندا نەبارى 18 ادام  عانا بولاتىن. ولار وسى بىرنەشە ادام بولا تۇرسادا، جيعان  ازعانتاي اقشالارىن،  ناعىز قيىنشىلىعى بار ادامدارعا كومەككە اتاپ، ولاردان شىن نيەتتەرىمەن اي سايىن  حال سۇراپ وتىردى.

بۇل   مەيىرلى جاندار توبىنىڭ قۇرىلعانىن ەستىگەن  جۇرەگىندە مەيىرىمى بار جاندار ىزدەپ  كەلىپ، وسى توپقا ءوز ەرىكتەرىمەن قوسىلىپ جاتتى. وسىلايشا قىسقا عانا ءبىر جارىم  جىل  ۋاقىت ىشىندە بۇل توپتىڭ سانى اۋەلگى 18 ادامنان 120 ادامعا  جەتتى.

بۇل  توپتاعى وسى 120 ادامنىڭ  ٪99 تى قازاق ۇلتى بولىپ، ولار وسى توپقا ءوز ەرىكتەرىمىن  قوسىلىپ، وسى توپتىڭ بارلىق ءتارتىپ تۇزىمىنە بويسىنىپ، اي سايىن ءاربىر ادام 30  يۋاننان كومەككە اقشا اتاپ وتىردى.30 يۋاننان جوعارى 50 يۋاننان 100 يۋانعا  دەيىن،ءتىپتى مۇنان دا كوپ بەرگەندەر بولدى.قاعيدا تەك 30 يۋاننان تومەن بولماۋى ءتيىس ەكەن. بۇل توپقا جاڭادان  تىركەلەتىن مۇشەلەر الدىمەن تىركەلۋ ءوتىنىشىن ءبىلدىرىپ، ونان سوڭ جاڭا مۇشە  كەستەسىن تولتىرىپ، توپتىڭ تارتىبىنە بويسىنۋ شارتىنا قول قويادى ەكەن.

وسىلايشا  بۇل توپ قۇرىلعاننان باستاپ قازىرگە دەيىن جيىنى 38 ادامعا اقشالاي كومەك بەردى.  بۇلاردىڭ بارلىعى جاعدايلارى ەڭ ناشار ادامدار ەدى. كەيبىرەۋى توسەك تارتىپ جاتىپ  قالعان بولسا، ال كەيبىرەۋلەرى اۋىرۋ جاعدايىنان دوحتىرعا كورىنە الماي وتىرعان نە  بولماسا تۇرمىس قينشىلىعىنان قولى وتە قىسقا بولعان ادامدار جانە قيىنشىلىعى بار  وقۋشىلار مەن جەتىم بالالار ەكەن. بۇل توپ قۇرىلعاننان قازىرگە دەيىن كومەك  بەرىلگەندەردىڭ ىشىندە قاريالار14ادام، ەرەسەكتەر 13 ادام، قينشىلىعى بار بالالار  مەن وقۋشىلار 11ادام بولىپ، ولارعا بەرىلگەن كومەك اقشا جيىنى 38مىڭ594يۋانعا  جەتىپتى.

بۇل  توپ ءار ايدىڭ 10-كۇنىنەن20-كۇنىنە دەيىنگى مەزگىلدى توپ مۇشەلەرىنىڭ كومەك  اقشالارىن تاپسىراتىن كۇنى،21-كۇنىنەن25-كۇنىنە دەيىنگى مەزگىلدى كەڭەس مۇشەلەرىنىڭ  كومەك بەرىلەتىن ادامدى اقىلداسىپ بەكىتۋ كۇنى، 26-كۇنىنەن 30-كۇنىنە دەيىنگى  مەزگىلدى كومەك بەرىلەتىن ادامداردىڭ ۇيىنە بارىپ حال سۇراۋ كۇنى ەتىپ  بەلگىلەدى.

بۇل  مەيىرلى جاندار توبىنىڭ ءتارتىپ ءتۇزىمى قاتاڭ،  بارلىق جۇمىسى مەن  ىستەرى ايقىن  دا ادىلەتتى بولىپ، اي سايىن كومەك بەرىلەتىن ادامدار مەن جيىلعان قارجى سوماسى توپقا ءجاريا  ەتىلىپ وتىرادى. سونىمەن قاتار، اۋەلى كومەك بەرىلەتىن ادامدار كەڭەس مۇشەلەرىنىڭ اقىلداسىپ  بەكىتۋىنەن وتكەن سوڭ، توپ مۇشەلەرىنە ءجاريا ەتىلىپ، ولاردىڭ پىكىر كەڭەسىن  الاتىنداي ادىلەتتتىككە يە ەكەن.

مەن  بۇل ماقالامنىڭ سوڭىندا وسىنداي وزدىگىنەن ۇيىمداسقان مەيىرلى جاندار توبىنىڭ  تاماشا شاپاعات ىستەرىنە قاسيەتتى ورازا ايىنىڭ ساۋابى ءتيسىن دەپ مىڭ مارتەبە  العىس ايتامىن! ءارى بۇل مەيىرلى جاندار توبىنىڭ يگىلىكتى ىستەرىن جوعارى  باعالايمىن! ءارى ولاردىڭ  قوعامعا جاقسى ۇلگى بولىپ، ادامدار اراسىنداعى  مەيىرباندىق پەن ءوزارا سۇيىسپەنشىلىكتى كۇشەيتكەنىنە سونداي-اق، قوعام  جاراسىمدىلىعى مەن ادامدىق قاسيەتتىڭ تۋىن ءبىر مارتە بيىككە كوتەرگەنىنە وسكەلەڭ  قۇرمەت بىلدىرەمىن! كورىكتى اقساي “التىنتاۋ باۋرايىنداعى مەيىرلى جانداردىڭ”   بۇكىل قوعامداعى  بارلىق ادامدارعا، ءتىپتى اقسايىمىزداعى ءار ۇلت حالقىنىڭ  ىنتىماعىنا ۇلگى بولىپ، وركەنىن كەڭ ءجايىپ، بارعان سايىن گۇلدەنە  تۇسۋىنە تىلەك  بىلدىرەمىن!

2017-جىلى  2-ءيۇن.

 

 

 

说点什么

ءبىرىنشى بولىپ پىكىر قالدىرىڭىز!

avatar
  Subscribe  
ەسكەرتۋ