7. ءناشاپاڭ

(قاسەن بولاتحان ۇلىنىڭ «ءومىر ەلەستەرى» اتتى جەلىلەس اڭگىمەلەرىنەن ءۇزىندى)

اۆد: قاسەن بولاتحان ۇلى

رەد: اسەمحان مۇقامەتحان قىزى


    تاعى دا قاڭعىرىعىم تۇتەپ، ەلدىڭ بوساعاسىندا تۇيە باعىپ جۇرگەن كەزىم. ءبىر كۇنى كەشكە تاياۋ تۇيەلەرىمدى جيىستىرعا جولعا شىقتىم.  كەنەت كۇن بۇزىلىپ قاتتى نوسەر جاۋدى. مەن تۇيەلەردى جىيستىرىپ ۇيگە  قايتىپ كەلسەم، ءۇي ءىشى كولكىلدەگەن  سۋعا تولىپ كەتىپتى. ەسكى تامنىڭ توبەسىنەن تامشى سۋلارى سامسيدى. ۇيدە ساكى ۇستىندە ءبىر بۇرىشتا ءناسىپجان( بۇكىل اۋىل ول كىسىنى سيلاپ، اتىن اتاماي ءناشاپاڭ دەيتىن)  اپامىز  توڭعانىنان سەلكىلدەپ ءبۇرىسىپ وتىر.  ءۇي ىشىنە تولعان جاڭبىر سۋى ءتور جاقتاعى بيىكتەپ سالعان ساكىگە جەتەيىن دەپ  قالىپتى. مەن دەرەۋ ساكىدە ءبۇرىسىپ وتىرعان  ءناشاپاڭنىڭ  كورپەلەرىن جاۋىپ قىمتاپ قويدىم دا، ءۇي ىشىندەگى سۋدى  دالاعا شىعارۋعا كىرىستىم. ەداۋىر ۋاقىت اۋرەلەنىپ ءجۇرىپ، ۇيدەگى سۋدى سىرتقا ارەڭ شىعارىپ بولدىم دا، وت جاعىپ، سۋىقتان بۇرىسكەن ءناشاپاڭا   شاي قايناتىپ بەردىم. كەمپىر شاي ءىشىپ بويى جىلىنعاننان كەيىن جادىراپ قالدى.
    ەرتەڭىندە جاۋىن باسىلعان سوڭ، تام توبەسىن جاماپ تاستاپ، شاي ۇستىندە ءناشاپاڭنىڭ كەڭەسىنە قۇلاق ءتۇردىم. ول كىسىنىڭ ايتۋىنشا وسى جولعى قاتتى نوسەر  20 جىلدىڭ الدىندا ءبىر رەت جاۋعان ەكەن، ودان بەرى مۇنداي قاتتى نوسەر جاۋماعان ەكەن.  بۇل راسىندا وتە ەرەكشە جاۋعان جاڭبىر بولدى، جالعاستى 4 كۇن، 4 ءتۇن  جاۋدى. ءناشاپاڭ اسقان قۇمالاقشى ادام ەدى. مەن ءناشاپاڭا قۇمالاق سالىپ بولاشاعىمدى بولجاپ بەرۋىن ءوتىندىم. ءناشاپاڭ قوي قورانىڭ تازا جەرىنەن قويدىڭ قىرىق قۇمالاعىن الدىردى.  قۇمالاقتى سىرماق ۇستىنە شاشىپ جىبەرىپ، ءبىراز  مۇلگىپ وتىرىپ، ءوز وزىنەن كۇبىرلەدى دە، ماعان بۇرىلا قاراپ: – قارعام، سەنىڭ جولىڭ اشىق، بولاشاعىڭ نۇرلى، باقىتتى بولادى ەكەنسىڭ!-دەدى. بۇل سوزدەر كەيىنگى كۇندەرى  مەنىڭ  كوڭىلىمە ۇلكەن مەدەۋ بولدى.
  مىنە وسىلايشا جىل اياعى دا كەلىپ جەتتى. جىل سوڭىنداعى ەڭبەك اقى  ءبولىس ۋاقىتى دا بولدى. جاعپان ەكەمىز قىستاققا  ءبولىس الۋعا باردىق. قالىڭ ادام بولىستەرىن الىپ، ءماز بولىپ جاتىر ەكەن. قىستاق بۇعالتىرى جاعپانعا  ءونىمىن ءبولىپ بەردى. جاعپان  ماعان قانشا ەڭبەك اقى بەرەدى دەپ مەن دە دامەلەنىپ توسىپ تۇرمىن. قىستاق بۇعالتىرى جاعپاننان ماعان قانشا ءبولىس بەرەتىنىن سۇراعاندا، جاعپان ماعان ءبولىس بەرگەننىڭ ورنىنا، قاسقىر جەگەن ءۇش بوتانى تولەۋىمدى سۇرادى. مەن لاجىسىز بۇل تولەمدى  ءبىر جىلدىق ەڭبەك اقىمنان  تارتىپ قالۋىن ايتتىم. سوندا ءبىر جىلدا قولىما تيگەن ەڭبەك اقىم  ارەڭ 300 يۋان عانا بولدى. سوندا ءناشاپاڭ كەمپىردىڭ مەنىڭ قايىرىمدى دا، ەڭبەكشىل ەكەنىمدى ايتىپ، كوڭىلىمە مەدەت بەرىپ، اراشاشى بولعانى  ءالى ەسىمنەن كەتپەيدى.

说点什么

ءبىرىنشى بولىپ پىكىر قالدىرىڭىز!

avatar
  Subscribe  
ەسكەرتۋ